घुंगरू : तमाशा व लोककलेचा आवाज जपणारा ‘घुंगरू – इशकाचा नाद खुळा’ लघुपट यूट्यूबवर प्रदर्शित

दिनांक 5 जानेवारी 2026 | विषेश प्रतिनिधी|

” घुंगरू – इशकाचा नाद खुळा हा पारंपरिक तमाशा व लावणीवर आधारित मराठी लघुपट तृप्ती फिल्म प्रोडक्शनतर्फे यूट्यूबवर प्रदर्शित झाला आहे. लोककलावंतांचे जीवन, संघर्ष आणि कलेला न्याय देण्याचा सामाजिक संदेश देणारा हा चित्रपट दिग्दर्शक रामदास राऊत यांच्या थिएटर फिल्मच्या संकल्पनेकडे वाटचाल दर्शवतो.”

घुंगरू हा शब्द केवळ नृत्याचा अलंकार नसून तमाशा, लावणी आणि लोककलेचा आत्मा आहे, हेच अधोरेखित करणारा घुंगरू – इशकाचा नाद खुळा हा मराठी लघु चित्रपट आज सोमवार, दिनांक ५ जानेवारी २०२६ रोजी सकाळी ९ वाजून ५६ मिनिटांनी अधिकृतपणे यूट्यूबवर प्रदर्शित झाला आहे. हा चित्रपट Trupti Film Production यांच्या अधिकृत यूट्यूब चॅनलवर प्रदर्शित करण्यात आला असून, तमाशा व लोककलेवर प्रेम करणाऱ्या रसिक प्रेक्षकांमध्ये या चित्रपटाबद्दल मोठी उत्सुकता निर्माण झाली आहे.

घुंगरू – इशकाचा नाद खुळा हा लघुपट अतिशय मेहनतीने आणि पारंपरिक तमाशा पद्धतीने साकारण्यात आला आहे. या चित्रपटामध्ये बहुतांश कलाकार तमाशा क्षेत्रातील असून, त्यांच्या मूळ शैलीतच चित्रपटाची मांडणी करण्यात आली आहे. कथानक हे लोककलावंतांच्या प्रत्यक्ष जीवनाशी निगडित असून, समाजाने लोककलावंतांकडे केवळ कलाकार म्हणून पाहावे, त्यांच्या कलेला न्याय द्यावा आणि लोककला जिवंत ठेवण्यासाठी सर्वांनी प्रयत्न करावेत, असा सामाजिक संदेश प्रभावीपणे चित्रपटातून देण्यात आला आहे.

या चित्रपटाची संकल्पना, लेखन आणि दिग्दर्शन रामदास (रामदेवराव) राऊत यांनी केले आहे. लोककला ही केवळ करमणुकीचे साधन नसून ती आपली सांस्कृतिक ओळख आहे, ही भूमिका त्यांनी ठामपणे मांडली आहे. घुंगरू या लघुपटामध्ये एकूण सात लावण्या असून, सात वेगवेगळ्या नृत्यांगनांचा सहभाग आहे. त्यामुळे पारंपरिक तमाशा, नृत्य, संगीत आणि अभिनय यांचा सुंदर संगम या चित्रपटात पाहायला मिळतो.

याचबरोबर दिग्दर्शक रामदास राऊत यांनी भविष्यातील आपल्या महत्त्वाकांक्षी योजनांविषयीही संकेत दिले आहेत. घुंगरू या लघुपटाच्या माध्यमातून लोककलेच्या प्रश्नांची मांडणी केल्यानंतर आता याच विषयाला अधिक व्यापक स्वरूप देत एक भव्य थिएटर फिल्म बनवण्याचा त्यांचा मानस आहे. तमाशा, ग्रामीण वास्तव आणि कलाकारांचे संघर्ष मोठ्या पडद्यावर प्रभावीपणे मांडण्याचा आपला संकल्प असल्याचे त्यांनी सांगितले असून, योग्य पाठिंबा आणि रसिक प्रेक्षकांचे प्रेम मिळाल्यास लवकरच थिएटरसाठी चित्रपट घेऊन येण्याचा विश्वास त्यांनी व्यक्त केला आहे.

चित्रपटात स्वर्गीय तमाशा सम्राट गुलाबराव बोरगावकर यांचे चिरंजीव पापाभाई बोरगावकर यांनी प्रमुख भूमिका साकारली आहे. त्यांच्या अभिनयाला जेष्ठ लावणी गायिका शोभा लाखे यांची साथ लाभली आहे. याशिवाय तमाशा क्षेत्रावर निस्सीम प्रेम करणारे वसंतराव जगताप (आण्णा), साई समर्थ नागरी सहकारी पतसंस्थेचे अध्यक्ष, तसेच ज्येष्ठ अभिनेते अण्णा लोणकर यांनी छोट्या पण लक्षवेधी भूमिका साकारल्या आहेत.

या चित्रपटामध्ये रेश्मा परितेकर, प्राजक्ता माटे, उमा तासगावकर, शुभांजली थोरात, लंका पाचेगावकर, उषा लाखे आणि रेश्मा लाखे या नृत्यांगनांचा सहभाग असून, कोरससाठी कविता लाखे, आशा लाखे आणि उषा लाखे यांनी प्रभावी कामगिरी केली आहे. तरुण कलाकारांनाही संधी देण्यात आली असून, वीरेंद्र दांगट, उदय ढगे, मोहिनी शिंदे, धनंजय कावळे, रमेश खुडे, सुरेश गायकवाड, श्रीराम विधाटे, फैजल पठाण, निळकंठ चोरे यांच्यासह अनेक कलाकार चित्रपटात झळकतात. ज्येष्ठ अभिनेत्री अलकाताई जोगदंड, ज्येष्ठ अभिनेते राजेंद्र ताम्हाणे, बबनराव गावडे आणि वजीर शेख यांची उपस्थिती चित्रपटाला अधिक सशक्त बनवते.

पाहुणे कलाकार म्हणून तमाशा अभ्यासक बाबाजी कोरडे तसेच बारामती येथील ज्येष्ठ तमाशा अभ्यासक राजेंद्र डी. मोरे यांनी छोट्या भूमिका साकारल्या आहेत. चित्रपटातील लावण्या व पार्श्वसंगीत चित्रा नलवडे आणि अनुष्का वावळ यांनी दिले असून, संगीत संयोजन योगेश कांबळे यांनी केले आहे. छायांकनाची जबाबदारी चंद्रकांत मोरे यांनी सांभाळली आहे.

चित्रपट प्रदर्शित झाल्यानंतर निर्माता, दिग्दर्शक व लेखक रामदासजी राऊत यांनी सर्व रसिक प्रेक्षकांना आवाहन केले आहे की, हा चित्रपट आवर्जून पाहावा आणि लोककलेच्या संवर्धनासाठी हातभार लावावा. चित्रपट आवडल्यास लाईक, शेअर आणि चॅनल सबस्क्राईब करून कलाकारांच्या पाठीशी उभे राहावे, असेही त्यांनी सांगितले आहे. पारंपरिक तमाशा आणि लावणीची खरी ओळख करून देणारा घुंगरू – इशकाचा नाद खुळा हा लघुपट निश्चितच रसिकांच्या मनाचा ठाव घेईल, असा विश्वास व्यक्त केला जात आहे.

About The Author

Dr.Nitin Pawar

डॉ. नितीन पवार हे सत्यशोधक ब्लॉगचे संस्थापक आणि संपादक आहेत. ते सामाजिक न्याय, शिक्षण, राजकारण आणि चालू घडामोडींवर धाडसी, विश्लेषणात्मक आणि जमिनीच्या पातळीवरील दृष्टीकोनातून लिहितात.

डॉ. राजकीय पवार सामाजिक प्रश्न, शिक्षण आणि राजकारणावर अभ्यासपूर्ण आणि निर्भीड लेखन करतात.

See author's posts