Operation Sindoor: ऑपरेशन सिंदूर 

Operation Sindoor: एक शौर्यगीत

धगधगत्या रक्तात जे उष्ण तेज असे,
त्यावर लढती वीर, त्यांच्या छायेत देश हसे.

“ऑपरेशन सिंदूर” ही केवळ लढाई नव्हे,
ती म्हणते एका अन्यायाच्या विरुद्ध न्याय हवे !

बर्फाच्छादित सीमेवरती , जेथे श्वासही अडथळतो,
तेथे आमचा जवान, अंगावर वीज घेऊन उभा असतो,
संध्याकाळी आला गुप्त आदेश,
“सिंदूर” नावानं घडली रणयात्रा विशेष.

कुठेही न दिसणारा शत्रू, साथीला काळोखी रात्र,
पण ज्यांच्या हृदयात धडकतो भारताचा भार,

त्यांनी नकाशावर नाही , काळजावरच चाल केली,
“हिंमत आहे तर फक्त पुढे या” हीच शपथ घेतली!

भयंकर गारठा, हिमवर्षाव, आणिक दाट जंगल,
शत्रू तर सापांसारखा, चपळ आणि चंचल,
पण आमचा सैनिक ‘वाघ’ निर्धाराने भिडतो,
तिरंग्यासाठी प्राण द्यायला सदैव सज्ज असतो!

गोळ्यांचा आवाज, बॉम्बचा स्फोट,
अंधारातच ओळखतो शत्रूचा मार्ग,
ती होती क्षणांची लढाई, पण नव्या युगांची तयारी,
“ऑपरेशन सिंदूर” ठरलं देशाच्या गर्वाचं शिखर भारी!

कोणी हरवले, तर कोणी परतले, काही फक्त स्मृतींमध्ये उरले,

आईच्या डोळ्यांत अश्रूंचे ‘सिंदूर’ वाहिले,
पण देशाचं शीर , त्यांच्या रक्ताने उजळले,
अजिंक्य पराक्रमाने इतिहासाचे एक पान फडफडले.

‘सिंदूर’ म्हणजे सौंदर्य नसते , की फक्त मंगळसूत्रही नव्हे,
तो सैनिकाच्या मस्तकावर विजयाचा ठसा आहे,

तो असतो बलिदान, त्याग, आणि शौर्याची किनार,
जिथे मृत्यूदेखील हात जोडून मागे हटतो निश्चयाच्या पार.

विजयाचा झेंडा फडकवला त्या शिखरावर,
संपूर्ण देश नमतो त्या वीरांच्या चरणांवर,
“ऑपरेशन सिंदूर” हे शब्द नाहीत ,
ते आहे जिवंत ‘गाथा’ – जय भारत, जय भारत !
——

कवी- डॉ.नितीन पवार,संपादक,’सत्यशोधक न्युज’

About The Author

Dr.Nitin Pawar

डॉ. नितीन पवार हे सत्यशोधक ब्लॉगचे संस्थापक आणि संपादक आहेत. ते सामाजिक न्याय, शिक्षण, राजकारण आणि चालू घडामोडींवर धाडसी, विश्लेषणात्मक आणि जमिनीच्या पातळीवरील दृष्टीकोनातून लिहितात.

डॉ. राजकीय पवार सामाजिक प्रश्न, शिक्षण आणि राजकारणावर अभ्यासपूर्ण आणि निर्भीड लेखन करतात.

See author's posts